Жаңалықтар
«Әйтеке биден қалған сөз»
Би, шешен, мемлекет қайраткері Әйтеке Байбекұлының туғанына 380 жыл толуына орай «Әйтеке биден қалған сөз» атты шешендік сөздерден сайыс өтті.
Қазақ халқының даналығы мен дәстүрлі шешендік асыл қазынасын оқырмандарға ұғындыру, мән-мағынасын ашу. Жас ұрпақты шешендік сөздер арқылы тапқырлыққа, шапшандыққа тәрбиелеу мақсатында өткен сайысқа қала мектептерінің 8 сынып арасында Б.Жолбарысұлы атындағы №18 орта мектеп-лицейі мен М.Жұмабаев атындағы №19 орта мектеп-гимназиясының үш оқушыдан құралған 2 топ қатысты.
Сайысқа әділ бағасын беріп төрелік етуге Абай атындағы №1 орта мектеп-гимназиясының қазақ тілі және әдебиет пәнінің мұғалімі Г.Құспекова, С.Сейфуллин атындағы орталық кітапханасының кітапханашысы, мәдениет қайраткері Г.Шегенова және оқырмандарға қызмет көрсету бөлімінің кітапханашысы М.Ерғалиева қазылық етті.
Сайыс төрт кезең бойынша өтті.
I-кезең «Сәлем - сөздің анасы» үй тапсырмасы.
II-кезең «Шешеннің сөзі – ақылдың көзі» шашыраңқы сөздерден шешендік сөздерді құрастыру.
III-кезең «Шешен – сөздің мәйегі» экраннан ұяшық таңдап, шешендік сөздерді жалғастыру.
IV-кезең «Кім жылдам?» екі топқа Әйтеке бидің өмірі мен шығармаларынан сұрақтар қойылды.
Топтар арасынан оза шауып алдыға шыққан «Ғаламат» тобы Б.Жолбарысұлы атындағы №18 орта мектеп-лицейінің 8 сынып оқушылары дипломмен марапатталса, «Қанаттылар» тобы М.Жұмабаев атындағы №19 орта мектеп-гимназиясының оқушылары және жетекшілері алғыс хатпен марапатталды.
